തലശേരി: കണ്ണൂര്‍ സര്‍വകലാശാല കലോത്സവത്തിനിടെ എസ്എഫ്ഐ നേതാക്കള്‍ തമ്മിലടിച്ചു. എസ്എഫ്ഐ കണ്ണൂര്‍ ജില്ലാ സെക്രട്ടറി ഉള്‍പ്പെടെയുള്ളവര്‍ക്കെതിരേ പാര്‍ട്ടി നേതൃത്വത്തിന് കാസര്‍ഗോഡ് ജില്ലാ സെക്രട്ടറി കെ. പ്രണവ് പരാതി നല്‍കി. ഞായറാഴ്ച പുലര്‍ച്ചെ മൂന്നോടെയാണു സംഭവങ്ങളുടെ തുടക്കം.
സംഘാടകസമിതി സജ്ജീകരിച്ചിരുന്ന ഗേറ്റിനു സമീപം കണ്ണൂര്‍ ജില്ലാ നേതൃത്വത്തിലുള്ള ചിലര്‍ നാട്ടുകാരുമായി സംഘര്‍ഷത്തില്‍ ഏര്‍പ്പെടുന്നതു ശ്രദ്ധയില്‍പ്പെട്ടതിനെത്തുടര്‍ന്നാണ് കാസര്‍ഗോഡ് ജില്ലാ സെക്രട്ടറി കെ. പ്രണവും മറ്റു ഭാരവാഹികളും സ്ഥലത്തെത്തിയത്. ഇരുവിഭാഗത്തെയും പിന്തിരിപ്പിക്കാനും സ്ഥിതി ശാന്തമാക്കാനും ശ്രമിക്കുന്നതിനിടെ കണ്ണൂര്‍ ജില്ലാ നേതൃത്വം തങ്ങള്‍ക്കെതിരേ തിരിയുകയായിരുന്നുവെന്നു പരാതിയില്‍ പറയുന്നു.
എസ്എഫ്ഐ കണ്ണൂര്‍ ജില്ലാ സെക്രട്ടേറിയറ്റംഗം ടി. ആശിഷ് കാസര്‍ഗോഡ് ജില്ലാ സെക്രട്ടേറിയറ്റംഗം അശ്വിന്‍ രാജിനെ അസഭ്യം പറയുകയും മുഖത്തടിക്കുകയും ചെയ്തു. തുടര്‍ന്ന് കണ്ണൂര്‍ സര്‍വകലാശാലാ യൂണിയന്‍ ചെയര്‍മാന്‍ നന്ദജ് ബാബു, അശ്വിന്‍രാജിന്‍റെ കോളറില്‍ പിടിച്ച് മര്‍ദിക്കാന്‍ ശ്രമിച്ചു. ഇതു തടയാന്‍ ശ്രമിച്ച കാസര്‍ഗോഡ് ജില്ലാ സെക്രട്ടേറിയറ്റംഗങ്ങളായ അഭിചന്ദ്, ശ്രീഹരി, ഏരിയ സെക്രട്ടറിമാരായ അനന്തു മോഹന്‍, അഭിനന്ദ് എന്നിവര്‍ക്കു നേരേയും കണ്ണൂര്‍ സംഘം അക്രമം അഴിച്ചുവിട്ടു. തനിക്കു നേരെയും കൈയേറ്റശ്രമം ഉണ്ടായതായി പ്രണവ് പരാതിയില്‍ പറയുന്നു.
ജില്ലാ സെക്രട്ടറി ശരത് രവീന്ദ്രന്‍റെ നേതൃത്വത്തിലാണ് ഈ അക്രമങ്ങള്‍ നടന്നതെന്നതാണ് ഏറ്റവും ഗൗരവതരമായ കാര്യമെന്നും ഉത്തരവാദപ്പെട്ട സ്ഥാനത്തിരിക്കുന്നവര്‍ അക്രമത്തിന് നേതൃത്വം നല്‍കിയത് സംഘടനയുടെ മൂല്യങ്ങള്‍ക്കും അച്ചടക്കത്തിനും നിരക്കാത്തതാണെന്നും പരാതിയില്‍ പറയുന്നു.
അക്രമത്തില്‍ നേരിട്ട് പങ്കെടുത്ത ടി. ആശിഷ്, നന്ദജ് ബാബു, ബിനില്‍, മൃദുല്‍, അമല്‍ പവന്‍ എന്നിവര്‍ക്കെതിരേ കര്‍ശനമായ സംഘടനാ നടപടികള്‍ സ്വീകരിക്കണമെന്നാണ് കാസര്‍ഗോഡ് ജില്ലാ കമ്മിറ്റിയുടെ ആവശ്യം.
അതേസമയം, കണ്ണൂര്‍ യൂണിവേഴ്‌സിറ്റി കലോത്സവ നഗരിയില്‍ എസ്എഫ്ഐ കണ്ണൂർ ജില്ലാ സെക്രട്ടറിയുടെ നേതൃത്വത്തില്‍ നടത്തിയ ഗുണ്ടായിസം വിദ്യാര്‍ഥികള്‍ക്കു നേരേയുള്ള വെല്ലുവിളിയാണെന്നും വിവിധ കാമ്പസുകളില്‍നിന്നും വന്ന കലാപ്രതിഭകള്‍ക്ക് സമാധാനാന്തരീക്ഷത്തില്‍ പരിപാടികള്‍ അവതരിപ്പിക്കാനുള്ള സാഹചര്യം ഒരുക്കുന്നതില്‍ സംഘാടകര്‍ പരാജയപ്പെട്ടുവെന്നും കെഎസ്‌യു ജില്ലാ കമ്മിറ്റി ആരോപിച്ചു.
Deepika
E-paper LOGIN
LOGIN
